राष्ट्रपति ट्रम्पद्वारा अमेरिकी जलवायु एजेन्सीमा कार्यरत सयौँ निष्कासित

अमेरिकी राष्ट्रपति डोनाल्ड ट्रम्प प्रशासनले वाणिज्य विभाग अन्तर्गत रहेको राष्ट्रिय समुद्री तथा वायुमण्डलीय प्रशासन (एनओएए) का सयौँ कर्मचारी निष्कासित गरेको छ । एनओएए अमेरिकाको प्रमुख जलवायु अनुसन्धान एजेन्सी हो ।

वाणिज्य विभागले बिहिबार दिउँसो कर्मचारीहरुलाई इमेल पठाउँदै उनीहरुको जागिर समाप्त भएको जानकारी गराएको थियो । विभागमा नयाँ नियुक्ति र बढुवा भएर परिक्षणकालमा रहेका कर्मचारीहरुलाई उक्त इमेल गरिएको हो ।

यस किसिमका अन्धाधुन्ध गरिएका कटौती निर्दयी र विचारविहिन रहेको कर्मचारीहरुले बताएका छन् । यसको प्रभाव देशभर नै पर्ने पनि उनीहरुको भनाइ छ ।

निष्कासन गरिएकामध्ये कतिपय कर्मचारीहरु शेड्युल ए मार्फत नियुक्त गरिएका थिए । यस प्रकृया भूतपूर्व सैनिक तथा अपाङ्गता भएका व्यक्ति जस्ता विविध पृष्ठभूमिका उम्मेदवारलाई अवसर दिन प्रयोग गरिन्छ । शेड्युल ए अन्तर्गत नियुक्त भएका कर्मचारीहरुको परिक्षणकालको अवधि दुई वर्षको हुन्छ, जसमा उनीहरुलाई कुनै कारणबिना नै हटाउन सकिने प्रवधान रहेको हुन्छ ।

मेरिल्याण्डका सिनेटर क्रिस भ्यान होलेनले वाणिज्य विभागभित्र गरिएको यस निष्कासन प्रकृया अवैध भएको भन्दै वाणिज्य सचिव हावर्ड लुटनिकलाई पत्र लेखेका छन् । सोही दिन जलवायु संस्था यूनियन अफ साइन्सटिस्टले पनि कर्मचारी बचाउन आग्रह गर्दै २५ सय भन्दा बढी वैज्ञानिकहरुले हस्ताक्षर गरेको पत्र सचिव लुटनिकलाई बुझाएको थियो ।

ट्रम्प प्रशासनले भने यी निष्कासनका बारेमा कुनै प्रतिकृया दिएको छैन ।  
 

द गार्जियन