बर्दिया । बर्दियाको बढैयातालमा आजभोली आगन्तुक चराहरु साइबेरिया लगाएतका विभिन्न स्थानबाट बसाइसराइ गरी आइपुगेका छन् । बर्दियामा चिसो मौसममा सबैभन्दा बढि आगन्तुक चरा पाइने बढैयातालमा चरा रमाइरहेको दृश्यावलोकन गर्न पाइन्छ ।
तालको पानीमा पौडी खेलिरहेका, विचरण गरिरहेका प्रशस्त चराहरू देख्न सकिन्छ । विशेषगरी पानीमा रमाउने सुनजुरे, हरि, बेल्चाठुँडे, खड्खडे, फुर्के, सिन्दुरे, हरियो टाउको हाँस र बिजुला गौरी चराहरू बढैयातालमा देखिने गरेका छन् ।
चराविद् रामबहादुर शाहीका अनुसार बढैयातालमा यतिबेला रैथाने र आगन्तुक चरा प्रशस्त मात्रामा देख्न सकिन्छ । अनौपचारिक रुपमा गरिएको अनुगमनमा यस बर्ष ५० भन्दा बढि प्रजातिका चराहरू बढैयातालमा देखिएको उनले बताए ।
गत वर्षको चरा गणनामा बर्दियामा बढैयातालमा सबैभन्दा बढी दुई हजार एक सय ४९ ओटा चराहरू फेला परेका थिए । तालमा गत वर्ष एक बच्चा सहित तीन ओटा सारस समेत फेला परेको थियो । सारसलाई विश्व मै संंवेदनशिल चराको सुचिमा राखिएको छ भने नेपालमा पनि संकटासन्न चराको रुपमा सारसलाई राखिएको छ ।
जति चिसो बढ्छ त्यती नै चराको संख्या बढ्दै जाने चराविद् शाहीले बताए । आगन्तुक चरा आएपछि विस्तारै चराको अवलोकन गर्न आउने पर्यटकको संख्या पनि वृद्धि हुन थालेको छ । चरा अवलोकन गर्न रुचाउने आन्तरिक र बाह्य पर्यटकको संख्यामा बढ्दै गएको छ । निकुञ्ज घुम्न आउने पर्यटकहरू बढैयातालमा चरा अवलोकन गर्नका लागि पुग्न थालेका छन् ।
बढैयाताल गाउँपालिका वडा नं ५ का वडाध्यक्ष तुलाराम थारूले तालमा आगन्तुक चराहरू आइरहेको बताए । उनले चरा हेर्नका लागि पर्यटकहरू आउन थालेकोले तालमा चहलपहल बढेको बताए ।
बढैयाताल एक सय ९ विगहा क्षेत्रफलमा फैलिएको छ । तालको गहिराइ तीन देखि सात फिट सम्म रहेको स्थानीयबासीहरू बताउँछन् । केही बर्ष अगाडि सम्म ठेक्का मार्फत माछापालन गरिएको तालमा हाल संरक्षण र पर्यटन प्रवद्र्धनका कार्यक्रमहरू सञ्चालन गरिएको छ । बढंैयाताल गाउँपालिकाको पहलमा विभिन्न निकायले ताल सुधारका लागि लगानी गरिरहेका छन् ।
नेपालमा ८ सय ९७ प्रजातिको चरा मध्ये २ सय प्रजातिका जलपक्षीको रहेका छन् । नेपालमा हरेक वर्ष एक सय ५३ प्रजातिका चराहरू बसाइ सरेर आउने गरेको तथ्याङ्क छ ।
